Fossar og Guðmundur Björnsson standa að stofnun sjóðastýringarfyrirtækisins Glyms eignastýringar ehf., sem tók formlega til starfa í byrjun mánaðarins. Guðmundur er framkvæmdastjóri nýstofnaðs fyrirtækis, en hann var áður forstöðumaður áhættustýringar hjá Kviku eignastýringu, eigna- og sjóðastýringarfélagi Kviku banka. Þar áður gegndi hann starfi framkvæmdastjóra rekstrarsviðs og áhættustýringar GAMMA Capital Management.

„Ég hlakka mjög til þess að takast á við spennandi uppbyggingu og verkefni á nýjum vettvangi. Þróun ytra umhverfis hefur haft í för með sér umtalsverðar breytingar í útlánastefnu hefðbundinna lánveitenda. Þetta gerir það að verkum að sérhæfðir lánveitendur á borð við lánasjóði eru í einstakri stöðu til að fylla í skarðið, einkum hvað varðar óhefðbundnar fjármögnunarlausnir til minni og meðalstórra fyrirtækja,“ segir Guðmundur Björnsson, framkvæmdastjóri Glyms.

Glymur eignastýring ehf. verður skráður rekstraraðili sérhæfðra sjóða og leggur áherslu á sérhæfðar fjárfestingar, einkum óskráðar skuldabréfa- og lánaafurðir, auk sérvalinna fjárfestinga fyrir fagfjárfesta.