Fimmtugur maður að nafni Augustin Dufatanye, sem er með íslenska kennitölu og skráður til heimilis í miðbæ Reykjavíkur, var í dag, fyrir Héraðsdómi Reykjavíkur, sakfelldur fyrir nauðgun og dæmdur í tveggja og hálfs árs fangelsi.
Aðdragandi málsins er sá að brotaþoli fór með vinum sínum á Kalda Bar miðvikudaginn 20. mars árið 2019 og var þar fram yfir miðnætti. Konan var í samskiptum við Augustin og fleiri á staðnum. Leiðir konunnar og samferðafólks hennar skildu um eittleytið um nóttina.
Konan vaknaði á sjötta tímanum morgunin eftir, fáklædd, í ókunnugri íbúð í fjölbýlishúsi. Hún klæddi sig og hraðaði sér með leigubíl heim til sín.
Í eftirmiðdaginn leitaði hún til neyðarmóttöku í fylgd með eiginmanni sínum. Þar gaf hún hjúkrunarfræðingi stutta frásögn um hvað gerst hefði en hún taldi að brotið hefði verið gegn sér kynferðislega. Gekkst hún undir sýnatökur, meðal annars vegna DNA-rannsóknar. Áverkar voru á kynfærasvæði konunnar. Um það segir í texta dómsins:
„Vitnið H læknir, gerði grein fyrir læknisskoðun brotaþola á neyðarmóttöku og staðfesti skýrslu um þá skoðun. Í framburði hans kom meðal annars fram að hann hefði gert
kvenskoðun á brotaþola. Áverkar á kynfærum hennar hefðu verið ferskir. Þeir hefðu bent til þess að stafa af samförum umfram það sem væri í samræmi við venjulegt ástarsamband og að samfarirnar hefðu staðið yfir í einhvern tíma. Ekki hefði verið rakamyndun í kynfærunum og því hefði teygst á húðinni með sprungumyndun. Um hefði verið að ræða sprungu hægra megin á milli barma, sprungur neðst í leggangaopi og eitt mjög lítið sár á þeim sama stað. Áverkar af þessum toga gætu hafa orðið til við það að fingri, einum eða fleirum, væri stungið inn í kynfærin en það væri ekki algengt. Samfarir væru hins vegar mun líklegri skýring á áverkunum, einkum varðandi fyrrgreindar sprungur neðst í leggangaopinu.“
Lögregla tók skýrslur af vitnum, meðal annars vinum brotaþola, ennfremur var myndefni úr eftirlitsmyndavélum á Kalda Bar skoðað.
Þegar skýrslur voru fyrst teknar af Augustin, hinum ákærða, kannaðist hann ekki við að hafa verið í samskiptum við konuna. Honum var þá sýnt myndefni úr eftirlitsmyndavélum Kalda Bars sem sannaði hið gagnstæða. Sagði hann þá að hún hefði gengið með honum heim um nóttina en leiðir skilið þar og hún tekið leigubíl heim til sín.
Talið var að konan hefði ekki getað veitt viðnám við tilburðum hins ákærða um nóttina vegna svefndrunga og ölvunar. Mælingar á alkóhólmagni í blóði hennar, þegar hún leitaði til neyðarmóttöku, mörgum klukkustundum eftir atvikið, studdu þetta. Þetta er jafnframt ástæðan fyrir því að konan hafði mjög slitróttar minningar um ofbeldið sem hún var beitt en glímdi við mikla vanlíðan eftir nóttina.
Fyrir dómi var metið að sönnunargögn studdu frásögn konunnar og framburður hennar var stöðugur og trúverðugur. Framburður hins ákærða var hins vegar metin ótrúverðugur. Þá bentu öll gögn fyrir rétti um ástand konunnar eftir atvikið, bæði líkamlegt og andlegt, til þess að hún hefði orðið fyrir kynferðisbroti.
Augustin Dufatanye var því sakfelldur fyrir nauðgun og dæmdur í tveggja og hálfs árs fangelsi. Hann var dæmdur til að greiða konunni 1,8 milljónir króna í miskabætur og allan sakarkostnað sem nemur hátt í fjórum milljónum króna.
