„Hjartað tekur alltaf aukaslag við svona fréttir en sem betur fer er þetta smit með tengsl við önnur smit en þetta veldur því að nokkuð margir fara í sóttkví,“ segir Hjördís Guðmundsdóttir, upplýsingafulltrúi Almannavarna, í tilefni þess að einn maður greindist utan sóttkvíar með Covid-19 í gær. Smitið hefur tengsl við smit sem hafa greinst nýlega.
Alls greindust sex í gær innanlands en fimm þeirra voru í sóttkví. Tveir greindust á landamærum. Hjördís segir að Almannavarnir séu ánægðar með þróun mála undanfarna daga en hún sé við öllu viðbúin.
