Leikritið Nashyrningarnir eftir Ionesco verður frumsýnt í Þjóðleikhúsinu annað kvöld. Benedikt Erlingsson leikstýrir verkinu en það fjallar um hvernig hversdagslífið í litlum bæ breytist þegar íbúarnir fara að breytast í nashyrninga.
Það er alltaf að verða vinsælla og vinsælla að birta auglýsingar á Facebook og ákvað Þjóðleikhúsið að nýta sér það. Auglýsingarnar sýndu nashyrning en dýrið er í bráðri útrýmingarhættu og er stofninn mjög viðkvæmur. Facebook var ekki alltof sátt með auglýsingar leikhússins og lokaði á þær. Samfélagsmiðillinn vill meina að þær innihaldi dýraníð. Hvers vegna Facebook telur venjulega mynd af dýrinu vera dýraníð er ekki vitað.
Í samtali við Fréttablaðið segir Jón Þorgeir Kristjánsson, markaðsstjóri Þjóðleikhússins að von sé að misskilningurinn verði leiðréttur innan skamms.
„Við vitum ekki hvort Facebook líti svo á að við séum með lifandi nashyrning í húsinu sem við séum að reyna að koma í verð, eða hvort þau haldi að við séum að pakka nashyrningakjöti í handhægar neytendaumbúðir á grillið. Hvort heldur er, þá er þetta ákaflega spaugilegt og ekki hægt annað en að hlæja að þessu,“ segir Jón.
Verkið Nashyrningarnir var fyrst sýnt í Evrópu árið 1959 og sýndi Þjóðleikhúsið það árið 1961.
Menntaskólinn við Hamrahlíð sýndi leikritið árið 1989 og fór Benedikt Erlingsson með hlutverk í sýningunni. Hér á myndinni fyrir neðan má sjá hann lengst til vinstri en einnig má sjá leikarann Atla Rafn Sigurðsson lengst til hægri.