Íslenskur karlmaður á sextugsaldri hefur verið handtekinn í bænum Torre Pacheco í Murcia-héraði á Spáni. Spænski miðillinn La Verdad greinir frá þessu, en Vísir greindi fyrst frá innanlands.

Þar kemur fram að maðurinn sé 59 ára gamall og að hann hafi áður hlotið dóma fyrir kynferðisbrot gegn börnum hér á landi, fyrst árið 1988 fyrir brot gegn fjórum börnum.

Í frétt La Verdad segir að spænsk lögregla hafi rannsakað meint kynferðisbrot mannsins frá því í fyrra. Við leit lögreglu í tölvu og síma mannsins fannst þá barnaklám.

Þá segir að maðurinn hafi alltaf notað sömu aðferð við að nálgast ætluð fórnarlömb sín. Hann hafi vingast við þau og svo tekið að bjóða þeim verðmæti í annarlegum tilgangi.

Spænska lögreglan hefur óskað eftir aðkomu Interpol að málinu til þess að kanna hvort maðurinn sé eftirlýstur annars staðar en hann er sagður hafa búið í Suður Ameríku á undanförnum árum.

Maðurinn hefur þegar verið leiddur fyrir dómara sem úrskurðaði að halda mætti manninum vegna rannsóknarhagsmuna.