„Veit ekki hvernig nóttin var hjá ykkur en ég þarf allavega að kaupa mér nýja vinnuskó.“
Þetta segir Sólveig Hauksdóttir skurðhjúkrunarfræðingur í færslu sem hún birti á samfélagsmiðlinum Twitter. Með færslunni birtir Sólveig mynd af skónum sínum en á myndinni má sjá að þeir eru útataðir í blóði eftir vinnu næturinnar.
Veit ekki hvernig nóttin var hjá ykkur en ég þarf allavega að kaupa mér nýja vinnuskó 😭🩸🩸🩸 pic.twitter.com/fz1fpdnq1f
— Sólveig (@solveighauks) April 12, 2021
Færsla Sólveigar hefur vakið mikla athygli á samfélagsmiðlinum og hafa margir tjáð sig um færsluna í athugasemdunum við hana. Fólk spyr Sólveigu til dæmis hvort lífi hafi verið bjargað og svarar hún því játandi. „Skítt með fína skó. Til hamingju,“ segir kona nokkur þá.
Eitthvað var um áhuga á skónum og af hvaða gerð þeir eru. „Þetta eru hrikalega góðir skór!“ segir Sólveig. „On Cloud X heita þeir. Ég hef átt marga hlaupa- og vinnuskó í gegnum tíðina og þessir eru alveg í toppnum. Á líka utanvegahlaupaskó frá sama merki. Ég keypti mína í Útilíf en þeir fást víðar.“
Í athugasemdunum var líka mikið af hjálpsemi en Sólveig fékk nokkuð af ábendingum um hvernig hún gæti þrifið skóna. Sólveig greinir svo sjálf frá því hvernig hún þreif þá en svo virðist vera sem aðferðin hafi virkað því hún birti aðra mynd af skónum eftir þrifin. „Skolaði þá upp úr köldu vatni, notaði efni sem brýtur niður blóð á þá, stakk þeim svo í Rodalon bað og þeir eru núna í þvottavélinni,“ segir hún og birti svo myndina sem sjá má hér fyrir neðan.
Staðan: pic.twitter.com/CRDl1Fp2WM
— Sólveig (@solveighauks) April 12, 2021
„Þeir eru að þorna núna þannig ég vona að þeir séu orðnir nokkuð blettafríir,“ segir Sólveig í samtali við DV um ástand skónna. „Ég hef yfirleitt hent skóm ef þeir lenda í svona en þessir eru glænýjir, ég keypti þá í síðasta mánuði og gat bara ekki hent þeim.“