María Ás Birgisdóttir var íbúi á meðferðarheimilinu Laugaland í Eyjafirði frá september 2001 til maí 2003. Meðan dvöl hennar á heimilinu stóð yfir varð hún ítrekað fyrir líkamlegu og andlegu ofbeldi af hendi Ingjalds Arnþórssonar sem þá var rekstraraðili heimilisins. María opnaði sig um málið í viðtali við Stundina.
María var aðeins fjórtán ára gömul þegar hún var lögð inn á Laugaland sem var meðferðarheimili fyrir ungar stúlkur. María glímdi þó ekki við fíknisjúkdóm og átti í raun og veru aldrei að vera lögð þangað inn. María varð fyrir kynferðisbroti árið 2000 og hafði það mikil áhrif á hana. Heimilisaðstæður voru erfiðar og því átti að senda hana í skóla úti á landi. Henni var þó aldrei tjáð að þessi skóli væri meðferðarheimili.
Í viðtalinu við Stundina lýsir María því ofbeldi sem hún varð fyrir á meðan dvöl hennar á Laugalandi stóð yfir en hún er níunda konan til að stíga fram og segja frá ofbeldinu sem átti sér stað þar við Stundina.
María hafði ítrekað samband við Barnaverndarnefnd meðan hún var íbúi á meðferðarheimilinu en það hafði lítil sem engin góð áhrif á ástandið. Skilaboð hennar til Braga Guðbrandssonar, þáverandi forstjóra Barnaverndarstofu, áttu að vera trúnaðarmál en Bragi fór með þau beint til Ingjalds og sagði honum frá því sem María hafði sagt sér. Það ýtti einungis undir ofbeldi gagnvart henni.
Bragi heimsótti Laugaland reglulega og samkvæmt konunum sem stigið hafa fram virtust hann og Ingjaldur mestu mátar. Þeir hafi farið saman á Akureyri og borðað á Greifanum þegar Bragi kom í heimsókn. Ekkert má þó finna um heimsóknir Braga á heimilið í gögnum sem Barnaverndarstofa afhenti Stundinni.
María reyndi í fjórgang að strjúka af heimilinu og í hvert skipti reyndi hún að upplýsa barnaverndarfulltrúa um ástandið á heimilinu. Það bar þó engan árangur og María alltaf send aftur til baka.
