Lögregla leitar að íslenskum karlmenni í tengslum við rannsókn á manndrápinu í Rauðagerði sem átti sér stað í fyrrinótt. Þetta kom fram í fréttum Stöðvar 2 og Bylgjunnar þar sem jafnframt kemur fram að lögregla á Íslandi eigi í samskiptum við Europol vegna málsins.

Tæplega fertugur karlmaður frá Litháen hefur verið úrskurðaður í gæsluvarðhald vegna málsins.

Málið er talið tengjast uppgjöri í undirheimum í tengslum við skipulagða brotastarfsemi.

Hinn látni var frá Albaníu en bjó hér á landi með íslenskri eiginkonu sinni og ungu barni, en eiginkona hans er ólétt af öðru barni þeirra.

Morðið var sérstaklega hrottalegt þar sem beitt var skotvopni, að því er talið skammbyssu, og varð hinn látni fyrir fjölda skota.  Vopnið er enn ekki fundið.

Áslaug Arna Sigurbjörnsdóttir, dómsmálaráðherra, segir áhyggjuefni að aukning sé á tilkynningum um vopnaða einstaklinga og við því þurfi að bregðast. Vopnaburður lögreglu sé þó ekki í kortunum.

Áslaug segist merkja meiri hörku í undirheimum og það kalli eftir viðbrögðum yfirvalda.

„Já það virðist vera að eðli brotanna sé að breytast sem og fjöldinn og það er verið að liggja yfir þessu og greiningar ríkislögreglustjóra sýna að það þarf að bregðast við.“

Karl Steinar Valsson, yfirlögregluþjónn hjá ríkislögreglustjóra, sagði í samtali við RÚV í kvöld að skipulögð glæpastarfsemi sé að verða ein alvarlegast ógn við samfélag og einstaklinga á Íslandi.