Enn hefur ekkert heyrst í John Snora Sigurjónssyni fjallgöngumanni en hann er ennþá staddur í hlíðum fjallsins K2. Pakistanski herinn sendi aftur þyrlur að leita að John og félögum hans á fjallinu en líkt og í gær þá bar sú leit ekki árangur.
Gestur Pétursson, vinur Johns Snorra, ræddi um leitina að vini sínum í samtali við mbl.is. Þar talaði hann meðal annars um hvað væri verið að gera til að leita að John Snorra og félögum hans. „Það eru tvær þyrlur frá pakistanska hernum búnar að vera að leita í morgun á ákveðnum stöðum í fjallinu. Þær fundu í raun og veru ekki neitt og sneru síðan til Skardu, en munu koma til baka samkvæmt þeim upplýsingum sem við höfum til að leita á öðru svæði,“ sagði Gestur.
Þá segir Gestur að verið sé á að nota flugvélar með sérstökum leitarbúnaði, ekki ósvipað þeim sem Landhelgisgæslan hér á landi notar, til að leita á fjallinu. „Við höfum hins vegar ekki fengið staðfestingu á því enn þá að þær hafi klárað leit,“ segir hann.
Gestur var spurður hvort möguleiki sé á því að John og hinir fjallgöngumennirnir hafi leitað sér skjóls í fjórðu búðum fjallsins. Gestur segir það vera möguleika en að það sé ekki eins líklegt og aðrar sviðsmyndir sem verið er að vinna með. „Tíminn er ekki að vinna með okkur,“ segir hann svo.
