Kristján Berg, sem þekktur er undir nafninu Fiskikóngurinn, vegna fiskbúða sem hann hefur rekið með miklum glæsibrag undir heitinu Fiskikóngurinn, er mjög ósáttur við tvo fráfarandi starfsmenn sína.
Þetta kemur fram í nýrri grein sem Kristján birti í dag á Facebook-síðu sinni. Hann segir:
„Það sem mér finnst skrýtið og ég hef ekki orðið var við er hvernig við fyrirtækja eigendur „þegjum“ alltaf yfir hvernig sumt starfsfólk hagar sér og látum sumt starfsfólk traðka á okkur eigendum og atvinnurekendum.“
Kristján greinir frá því að hann hafi misst frá sér tvo starfsmenn um helgina sem unnið hafa hjá honum í nokkur ár. Starfsmennirnir ræddu ekki við hann málið heldur sögðu upp með sms og voru horfnir á braut. Ekki virtist inni í myndinni að vinna uppsagnarfrest. Kristján er mjög ósáttur við þessa framkomu:
„Það sem er svo skrýtið er: Þegar starfsmaður sem hefur starfað hjá mér í 3-4 ár, sendir mér „SMS“ um að vera hættur og ætli sér ekki að vinna uppsagnarfrestinn !
Það finnst mér vera mjög skrýtið og eiginlega hálf kjánaleg framkoma.
Hvers vegna getur starfsmaður ekki komið hreint fram, tekið létt spjall, rætt málin og samið við vinnuveitanda um starfslok.
Starfsmenn vilja alltaf fá uppsagnarfrestinn greiddann ef þeim er vikið úr starfi en mörgum starfsmönnum finnst allt í lagi að LABBA út af vinnu stað þegar þeim dettur í hug og það á ekki að vera neinn eftirmáli af því.“
Kristján segist hafa komist að því að starfsmennirnir hafi verið búnir að ráða sig hjá öðru fyrirtæki áður en þeir sögðu upp hjá honum. Þeir hafi gert ráðningarsamning við annað fyrirtæki á meðan enn var í gildi ráðningarsamningur milli hans og þeirra. Þetta vekur eftirfarandi spurningar hjá Kristjáni:
„1. Getur starfsmaður hlaupið í burtu?
2. Hver er ábyrgð starfsmanns?
3. Hver ber ábyrgð á tjóni fyrirtækis þegar þetta gerist?
4. Hver á að greiða fyrir að fá nýjan starfsmenn, þjálfun?
5. Er starfsmaðurinn ábyrgur? ef já, fyrir hverju. Ef nei, hvers vegna ekki?
6. Fyrirtæki sem ræður inn starfsmann sem er þegar með ráðingarsamning við annað fyrirtæki, má það halda áfram með starfsmanninn í vinnu.
7. Er fyrirtækið sem ræður starfsmann til vinnu með einhverja ábyrgð, já eða samvisku til þess að halda áfram með „starfsmanna liðhlaupa““
Kristján bendir á að ef knattspyrnumaður hjá KR kæmi svona fram yrði allt vitlaust. Hann segir að honum finnist að allir verði að standa við gerða samninga og enginn afsláttur sé gefinn á því að þegar starfsmanni er sagt upp sé honum greiddur uppsagnarfrestur.
Kristján segir ennfremur:
„Fyrirtækið sem réði þessa starfsmenn inn, og veit sögu mína og þessa starfsfólks ætti að skammast sín fyrir að gera ekkert í þessu og spila sig saklaust af þessu.“
Grein Kristjáns í heild og umræður um hana má lesa með því að smella á tengilinn fyrir neðan:
