Veðurstofan varar við rennblautri sunnanátt á miðvikudaginn í gulri viðvörun sinni sem hún birti í dag.

Segir þar að íbúar höfuðborgarinnar megi búast við 13-20 m/s og hvössum vindstrengjum við fjöll, allt að 25-35 m/s, sérstaklega við Hafnarfjall. Bendir Veðurstofan sérstaklega á að akstur kann að reynast varasamur, sérstaklega fyrir ökutæki sem taka mikinn vind á sig.

Sama er uppi á teningnum fyrir Breiðafjarðarsvæðið og Vestfirði. Má því búast við sterkum vindhviðum á norðanverðu Snæfellsnesi eins og gjarnan fylgir svo stífri sunnanátt og hávaðaroki á sunnanverðum Vestfjörðum, sér í lagi frá Barðaströnd og vestur að Látrabjargi.

Veðrinu mun, samkvæmt spá Veðurstofunnar, ganga niður að mesta um kvöldmatarleyti annað kvöld.

Þó veðrið á fimmtudaginn kalli ekki á litaða viðvörun er það ekki til að hrópa húrra yfir heldur. Heldur svalt og rigning á köflum um allt land. Heilt yfir virðist Atlantshafið vera að kasta haustinu yfir landsmenn með þó nokkrum látum næstu daga.