Björgunarsveitir frá Hellu og Hvolsvelli voru kallaðar út í morgun vegna ökumanns sem festi bíl sinn í Kaldaklofskvísl við Hvanngil. Maðurinn þurfti að fara upp á þak bílsins því vatn flæddi inn í bílinn. Maðurinn var búinn að vera á þaki bílsins í um tvær klukkustundir þegar björgunarmenn komu að.

„Vel tókst að koma manninum í land en unnið er að því að koma bílnum úr ánni. Var hann farinn að grafast niður og mátti því ekki tæpara standa að bjarga manninum,“ segir í tilkynningu frá Landsbjörgu. Þá segir enn fremur:

„Rétt er að benda á að vegna rigninga hefur vaxið mikið í ám á hálendinu og eru margar þeirra því illfærar og jafnvel ófærar óbreyttum jeppum.“

Meðfylgjandi myndir eru frá vettvangi.