Í fyrstu bylgju kórónuveirufaraldursins og í sumar jókst áfengissala töluvert. Samkvæmt tölum frá ÁTVR var salan 8,2% meiri í mars á þessu ári en í sama mánuði í fyrra. Í apríl var salan 31,6% meiri en í sama mánuði í fyrra.

Fréttablaðið skýrir frá þessu. 2,4 milljónir lítra af áfengi seldust í apríl en voru 1,8 milljónir í apríl á síðasta ári. Í maí var aukningin 18,5% og 14,8% í júní. í júlí var aukningin 26,6% en samanburður á milli ára er ekki raunhæfur þar sem verslunarmannahelgarsalan var í júlí á þessu ári en í ágúst á síðasta ári.

Fréttablaðið hefur eftir Víði Sigrúnarsyni, yfirlækni á Vogi, að hann finni fyrir þessu í störfum sínum.

„Fólk fór að vera meira heima í sóttkví, eða að vinna. Þá voru færri hindranir og það fór að drekka meira áfengi. Fólk hefur verið í dagdrykkju jafnvel frá morgni til kvölds og er að koma veikara inn til okkar. Þá er fólk farið að drekka spritt,“

er haft eftir honum.

Curtis P. Snook, sérfræðingur í klínískum eitrunarfræðum á Landspítalanum, sagði að sprittið sem er notað til að verjast COVID-19 faraldrinum innihaldi meira en 80% af etanóli.

„Aðalvandamálið er etanólmagnið, það eykur líkurnar á meðvitundarleysi og uppköstum í lungu. Þetta er mjög sterkt áfengi og margir taka ekki eftir því hvað þetta er sterkt.“