Þrettán ný innanlandssmit af COVID-19 greindust í gær og eitt við landamæraskimun. Er þetta fjölgun frá því daginn áður þegar greindust 7 smitaðir. Nú eru 72 í einangrun og 569 í sóttkví. Virk smit eru 72.
Töluvert fleiri sýni voru tekin á veirufræðideildinni í gær en daginn áður. Fimm prósent reyndust með smit. Mjög fáir hafa greinst smitaðir í skimunum Íslenskrar erfðagreiningar.
„Við erum að sjá nokkurn fjölda af nýjum tilfellum af hópsýkingu. Áhyggjuefni er að smitin eru dreifð og við virðumst ekki hafa náð fullum tökum á þessari hópsýkingu,“ sagði Þórólfur Guðnason sóttvarnalæknir á upplýsingarfundi Almannavarna.
Þórólfur sagði að næstu dagar munu skera úr um hve mikil dreifingin er. Hins vegar bendi niðurstöður skimana Íslenskrar erfðagreiningar til þess að smit í landinu sé ekki útbreitt. ÍE hafi skimað um 2.700 manns undanfarna daga og aðeins tvö smit hafi greinst.
Þórólfur sagði að eftir eina til tvær vikur kæmi í ljós hvaða árangur hertar aðgerðir vegna veirunnar skili okkur.
