Blaðamaður DV fór á stúfana í miðbæ Reykjavíkur í gær að kanna ástand á skemmtistöðum miðbæjarins. Mikið hefur verið rætt um bágt ástand sóttvarna á eitthverjum stöðum og var m.a. einum veitingastað lokað síðustu helgi af lögreglu vegna brota á sóttvarnarreglum. Hefur lögreglan ráðist í mikið átak þar sem fylgst er með þessum málum.

Svo virðist sem að batnandi ástand innandyra hafi kostað það að ástandið versnaði til muna utan við staðina. Raðir voru lengri og fleiri dvöldu úti þar sem meiri nærvera var möguleg. Einn netverjinn talaði tæpitungulaust í gærkvöldi þegar hann sagði að „engir andskotans tveir metrar væru á milli manna í sígóhorninu.“

Óljóst er hver ber ábyrgð á nefndum útisvæðum. Í tilfellum þar sem borð og stólar eru settir upp utandyra og veitingaleyfi nær út fyrir dyr staðarins mætti e.t.v. færa fyrir því rök að leyfishafinn beri þar ábyrgð á að viðhalda tveggja metra reglu, en þar sem fólk stendur einfaldlega í þvögu utan skemmtistaðar er vafalaust erfiðara að færa þá ábyrgð á herðar veitingamanna.

DV setti sig í samband við lögreglu vegna málsins og spurðist fyrir um ofangreind vafamál, en hefur enn sem komið er ekki fengið nein svör.

DV kannaði meðal annars ástandið á Danska barnum, Röntgen og Kofa Tómasar frænda í gærkvöldi. Allir staðirnir voru með sitt á hreinu að innan, en sem fyrr sagði og sem sjá má á myndunum, var aðra sögu að af ástandinu utan þeirra. Myndirnar hér að neðan segja svo sína sögu: