Kona ein sem fékk klippingu og strípur hjá stofunni Unique hár og spa í Síðumúla, fór út að sögn til að ná í greiðslukort sitt til að greiða fyrir þjónustuna, en kom síðan ekki aftur. Vegna grímuskyldu á hárgreiðslustofum í Covid-faraldrinum er erfitt að bera kennsl á þá örfáu kúnna sem geta reynst óheiðarlegir og greiða ekki fyrir þjónustuna.
Þetta kemur fram í tilkynningu á Facebook-síðu fyrirtækisins en RÚV greindi einnig frá.
Í færslunni segir:
„Sæl öll, vorum að lenda í einkennilegu atriði, hér bókar tíma nýr kúnni, labbar inn með grímu, fær klippingu og strípur og klárar meðferðina sína hjá okkur, stekkur svo út í bíl til að „sækja kortið sitt“ og við höfum ekki séð hana síðan. Þessi kona er ekki til á fésbókinni og símanúmerið hennar er að sjálfsögðu ekki til….
Við erum að fara betur yfir eftirlitsmyndarvélar til að skoða hvort við náum einhverstaðar andlitsmynd af henni – sem er ekki líklegt, þar sem hún tekur ekki niður grímuna ;(
….. verum á varðbergi gagnvart þessu fólki !“
Í samtali við RÚV segir eigandinn ekkert óeðlilegt við að kúnnar þurfi að fara út í bíl eftir veskinu sínu. Gallinn við þennan viðskiptavin var að hún kom aldrei til baka.
