Íslensks manns, Konráðs Hrafnkelssonar, sem búsettur er í Belgíu, er saknað. Síðast sást til hans á McDonalds-stað í miðborg Brussel á fimmtudagsmorgun kl. 9. Hann fór burt frá heimili sínu sama dag kl. 8:10. Konráð er fæddur árið 1992.
Unnusta Konráðs, Kristjana Diljá Þórarinsdóttir, lýsir eftir Konráð í opinni færslu á Facebook. Þar kemu fram að hann er 1,78 m á hæð, var klæddur í bláar gallabuxur og hvíta Nike-skó. Hann var með bakpoka og húfu á höfði (hvorttveggja dökkt) og svört Marshall heyrnartól. Meðferðis hafði hann blátt reiðhjól.
Kristjana veitti DV leyfi til birtingar á færslunni og myndefni. Hún segir að ekkert nýtt sé að frétta af málinu umfram það sem kemur fram í færslunni. Er DV hafði samband við Svein Guðmarsson, upplýsingafulltrúa Utanríkisráðuneytisins í morgun, var honum ekki kunnugt um að atvikið hefði verið tilkynnt til borgaraþjónustu ráðuneytisins.
Í samtali við DV segir Kristjana að tilkynningar til lögreglu og ráðuneytisins séu í vinnslu.
UPPFÆRT KL. 12:50
Sveinn Guðmarsson, upplýsingafulltrúi Utanríkisráðuneytisins, hafði samband við DV með upplýsingar um að aðstandendur Konráðs væru komnir í samband við borgaraþjónustu utanríkisráðuneytisins. Mun hún aðstoða þá varðandi samskipti við yfirvöld í Belgíu, þar á meðal lögreglu.
Lögreglan á Norðurlandi eystra lýsir nú eftir Konráði í en í tilkynningu hennar segir:
Lögreglustjórinn á Norðurlandi eystra lýsir eftir Konráði Hrafnkelssyni. Konráð yfirgaf heimili sitt í Belgíu að morgni 30.07.sl. um kl: 08:10. Um kl: 09:00 þann sama morgun sást til Konráðs á McDonalds í miðbæ Brussel. Þegar Konráð yfirgaf heimili sitt var hann klæddur í bláar gallabuxur, gráan bol og hvíta Nike íþróttaskó, dökka derhúfu, svört Marshall heyrnatól og með dökkan bakpoka. Konráð var á bláu reiðhjóli. Lögreglustjórinn á Norðurlandi eystra óskar eftir upplýsingum frá öllum þeim sem mögulega vita eitthvað um ferðir Konráðs eða hvar hann er að finna.