COVID-smit hefur greinst í tveimur starfsmönnum matvælafyrirtækis á höfuðborgarsvæðinu. Er þar um að ræða fyrirtæki sem flytur inn og dreifir matvælum. Bæði Fréttablaðið og RÚV greindu frá þessu í dag. Fréttablaðið reyndi að fá upplýsingar um hvaða fyrirtæki þetta er, hjá bæði Sóttvarnalækni og Almannavörnum, þar sem um væri að ræða upplýsingar sem eigi erindi til almennings. Sóttvarnalæknir og Almannavarnir neituðu að veita þessar upplýsingar.
Athygli vekur að RÚV hefur upplýsingar um fyrirtækið en greinir ekki frá þeim. Tók RÚV nafnlaust viðtal við forstjóra fyrirtækisins og sagði hann að smitið hefði komið upp í byrjun vikunnar í tíu manna innpökkunardeild.
DV hafði samband við Breka Karlsson, formann Neytendasamtakanna, og óskaði eftir áliti hans á þessari upplýsingaleynd:
„Ég tel að allar upplýsingar sem viðkoma neytendum ættu að vera þeim ljósar nema að annað krefjist þess að þær séu það ekki. Ég myndi þá vilja vita hvaða hagsmunir það eru sem vörnuðu því,“ sagði Breki.
Hvað varðar afstöðu ríkisfjölmiðilsins, að búa yfir þessum upplýsingum en birta þær ekki, þá sagði Breki að þar ætti sama svarið við:
„Ég tel að allar upplýsingar eigi að vera á borðinu nema að ríkar ástæður séu til annars og ef svo er þá vil ég fá að vita hvaða ástæður það eru.“
