Blaðamaður DV sendi síðdegis tölvupóst á Icelandair með nokkrum spurningum til að skýra stöðu mála hjá félaginu, en líkt og greint var frá í dag þá hefur Icelandair slitið samningaviðræðum við Flugfreyjufélag Íslands, auk þess sem öllum flugfreyjum og flugþjónum verður sagt upp.
Í kjölfarið hefur Flugfreyjufélag Íslands lýst því yfir að umfangsmiklar verkfallsaðgerðir muni eiga sér stað. Þá hefur stjórn og trúnaðarráð FFÍ samþykkt að boða allsherjarvinnustöðvun félagsmanna hjá Icelandair. Atkvæðagreiðsla félagsmanna mun hefjast föstudaginn 24. júlí og standa yfir til 27. júlí.
Í svörum sem bárust til DV frá Icelandair í kvöld kemur fram að Iclandair hyggist ræða við íslenskt stéttarfélag, til þess að halda sig á íslenskum vinnumarkaði. Auk þess skýrðu svör Icelandair þá ákvörðun að láta flugmenn starfa sem Cabin Crew. Einnig kemur fram að Icelandair telji það „óhugsandi“ að starfsmenn fari í verkfall „miðað við stöðuna í þjóðfélaginu“.
Veistu hvort verkfallsboðunin gildi yfir flugfreyjur Air Iceland Connect?
„Icelandair hefur ekki fengið formlega verkfallsboðun. Air Iceland Connect var ekki aðili að kjaradeildu Icelandair og FFÍ. Við höfum þó sagt að við teljum óhugsandi að starfsmenn fari í verkfall á þessum tímapunkti miðað við stöðuna í þjóðfélaginu.“
Hver eru áhrif verkfallsins, fyrst Icelandair segist ætla að nota flugmenn í cabin crew frá og með mánudeginum?
„Icelandair hefur ekki fengið formlega verkfallsboðun. Það hefur hins vegar verið tekin ákvörðun um að manna stöður um borð í flugvélum félagsins án aðkomu félagsmanna FFÍ frá og með mánudeginum en sú ákvörðun var tekin án þess að nein umræða um verkfall hafði farið af stað. Verkfall snýst almennt um það að starfsmenn leggi niður störf en þar sem ekki hefur verið óskað eftir vinnuframlagi núverandi flugfreyja og flugþjóna frá og með mánudeginum þá hefði slíkt verkfall ekki áhrif á starfsemi félagsins.“
Verður þetta ekki til þess að launakostnaður ykkar í uppsagnarfrestinum lækkar?
„Ef verkfall verður boðað þá falla almennt niður skyldur atvinnurekenda og launþega samkvæmt ráðningarsambandi, þ.e. bæði skyldan til þess að greiða laun og inna af hendi störf.
Hvaða „nýja stéttarfélag“ er þetta sem þið vísið til í tilkynningu ykkar í morgun?
„Það var ekki vísað til neins sérstaks stéttarfélags heldur þess að Icelandair hyggst starfa áfram á íslenskum vinnumarkaði og mun því leitast við að tala við annan samningsaðila á hinum íslenska vinnumarkaði.
Verið er að skoða ýmsa möguleika en ekki er tímabært að gefa meira upp um það að svo stöddu. En taka má fram að til stendur að ræða við íslenskt stéttarfélag.“
Ops sendi póst á flugmenn í dag þar sem talað var um að þeir ættu að gefa sig fram sem vilja vera öryggisfulltrúar um borð – verða þeir þá ráðnir sem „öryggisfulltrúar;“ eða flugmenn og nýttir sem öryggisfulltrúar?
„Þjálfun flugmanna er yfirgripsmikil og tekur á þeim öllum þeim þáttum sem snúa að almennu flugöryggi um borð í flugvélinni. Flugmenn munu sinna störfum öryggisliða en eru ekki ráðnir sérstaklega sem öryggisliðar, heldur vinna þeir þau störf sem farið er fram á í samræmi við kjarasamninga og flugrekstrarhandbók.“
