Íslenskir hátíðarhaldarar tapa milljörðum króna vegna heimsfaraldurs kórónuveirunnar. Flestum hátíðum hefur verið aflýst og þær sem verða haldnar verða haldnar með breyttu sniði. Sumir sitja uppi með háan fastan kostnað. Þyngstu höggin fá þeir sem standa að stórum hátíðum á borð við Þjóðhátíð í Vestmannaeyjum og Secret Solstice. Í gær var tilkynnt að Þjóðhátíðin falli niður í ár vegna fjöldatakmarkana.

Morgunblaðið skýrir frá þessu. Velta Secret Solstice og Þjóðhátíðar hleypur á mörg hundruð milljónum ár hvert. Hefur Morgunblaðið eftir Víkingi Heiðari Arnórssyni, framkvæmdastjóra Secret Soltice, að tekjutapið sé 500 til 600 milljónir.

„Þegar sú staða kom upp í vor að það þyrfti að fresta hátíðinni vorum við sem betur fer í góðri stöðu fjárhagslega og allir erlendir listamenn sem áttu að koma fram tilbúnir að skuldbinda sig til þess að koma fram á næsta ári. Þá er verið að klára viðræður við íslenska listamenn. Tap hátíðarinnar vegna veirunnar er þess vegna bara fólgið í sokknum markaðs- og launakostnaði fram að frestun.“

Er haft eftir Víkingi en um tíu þúsund manns hafa sótt tónleika Secret Solstice árlega. Hátt í tuttugu þúsund hafa lagt leið sína til Eyja á Þjóðhátíð árlega.

Fleiri hátíðum hefur einnig verið fresta. Má þar nefna Neistaflugi í Neskaupstað, Mýrarboltanum á Ísafirði og Landsmóti hestamanna á Hellu. Áætlað er að beint tekjutap Landsmóts hestamanna sé á annað hundrað milljónir króna. Hér er aðeins um beinan tekjumissi að ræða í öllum tilfellum, óbeinn tekjumissir er einnig umtalsverður.