Þórólfur Guðnason sóttvarnalæknir ætlar að leggja til að Íslendingar sem koma til landsins, sem og útlendingar með búsetu á Íslandi sem koma til landsins, verði settir í 4-5 daga sóttkví eftir komu og þeir síðan skimaðir á ný.

Þetta kom fram á upplýsingafundi Almannavarna um kórónuveirufaraldurinn.

Helsta ástæðan fyrir þessum áformum er sú að dæmi eru um að fólk hafi ekki greinst með nýlegt smit við komu en smit hafi greinst síðar. Þórólfur sagði að þessi áform krefjist mikillar skipulagningar.

Þórólfur leggur ennfremur til að Íslendingar eða útlendingar búsettir hér sem koma til landsins fari mjög varlega fyrstu tvær vikurnar. Þeir þurfi ekki að vera beinlínis í sóttkví en æskilegt er að atferli þeirra sé sem næst því að vera í sóttkví.

Af þeim fjórum smitum sem greindust á landamærunum síðasta sólarhring eru tvö gömul smit. Hugsanlegt er að það gildi um þriðja smitið líka en niðurstöður eru ekki komnar.

Um 20.000 manns hafa komið til landsins síðan landamæraskimun hófst og slakað var á kröfum um sóttkví. Af þeim hafa um 15.000 verið skimaðir og niðurstöður eru aðeins sex virk smit. Þórólfur segir að það sé hvetjandi að ekki hafi fundist meira smit en raun ber vitni.

Gjaldtaka vegna skimunar hófst í dag. Það kostar 11.000 krónur að fara í kórónuveiruskimun á flugvellinum, sé greitt á staðnum en 9.000 krónur sé greitt fyrirfram. Talið er að gjaldtaka hafi gengið vel í dag.