Stuttu eftir fréttaflutning RÚV birti Sigurður Bogi Sævarsson, fyrrum blaðamaður DV, gamalt viðtal sem hann tók við þær systur árið 2003. Hann segir örlög þessara merkilegu heimskvenna dapurleg. Í greininni kemur meðal annars fram að systurnar voru áberandi vinnusamar og eignuðust smám saman fleiri og fleiri íbúðir í sama fjölbýlishúsinu við Austurbrún.
Fjölbýlishúsið var vel mannað á 12. hæðinni en um tíma bjó þarna fyrrum alheimsfegurðardrottningin Hólmfríður Karlsdóttir, sem var þá aðeins telpa og bjó í blokkinni með foreldrum sínum, Ómar Ragnarsson fréttamaður og Árni Johnsen, fyrrum alþingismaður. Systurnar voru vel tengdar og vinamargar enda höfðu þær gengt mikilvægum ábyrgðarstöðum. Sú eldri vann lengi hjá bandaríska sendiráðinu og sú yngri hjá Alþjóðabankanum í Washington.
Sigurður Bogi Sævarsson blaðamaður birti þessa mynd á Facebook í dag með þeim orðum að hann hafi skrifað sögu systranna í DV í janúarlok 2003 og bætir við: „Erla og Ástríður bjuggu á tólftu hæð í Austurbrún 12, áttu fimm af sex íbúðum á hæðinni. Sveitastúlkur úr Skagafirði sem urðu heimskonur í hárri blokk. Dapurleg örlög á merkri sögu.“