Umferðarslys varð á Vesturlandsvegi fyrir stundu. Mikill fjöldi viðbragðsaðila er á vettvangi og á leið á vettvang. Lokað hefur verið fyrir umferð um Vesturlandsveg á Kjalarnesi og einnig eru Hvalfjarðargöng lokuð.

Vesturlandsvegur er lokaður til norðurs við Þingvallaveg. Vísir.is segir að einn bílanna, sem lenti í slysinu, hafi verið með vagn í drætti. Slökkvilið höfuðborgarsvæðisins gat ekki upplýst hversu margir bílar hafi lent í slysinu.

Þrír sjúkrabílar og tveir dælubílar voru sendir á vettvang auk lögreglu.

Vegagerðin segir á Twitter að löng lokun verði vegna slyssins. RÚV segir að þyrla Landhelgisgæslunnar hafi lent sunnan megin við Hvalfjarðargöngin á fjórða tímanum.

Uppfært klukkan 15:55. Þær upplýsingar voru að berast frá lögreglunni að Hvalfjarðargöng verði opnuð eftir augnablik og verði síðan notast við eftirfarandi hjáleið: Beygt til vinstri þegar komið er út úr göngunum, áleiðis Hvalfjarðarveg og síðan yfir Kjósarskarð og síðan Þingvallaleið.

Uppfært klukkan 16:01. Fréttablaðið segir að einn hafi verið fluttur með þyrlu á slysadeild Landspítalans. Viðkomandi mun hafa verið á leið til Reykjavíkur með sjúkrabíl sem komst ekki áfram vegna lokana og umferðarteppu og var þyrlan því send eftir honum.

Uppfært klukkan 16:20. Þrír verða fluttir á slysadeild með sjúkrabílum. Vísir.is skýrir frá þessu.

Uppfært klukkan 16:35. Þrír hafa verið fluttir á slysadeild. Húsbíll og tvö mótorhjól skullu saman.