Samninganefnd Flugfreyjufélags Íslands (FFÍ) skrifaði í nótt undir nýjan kjarasamning við Samtök atvinnulífsins/Icelandair. Samingurinn gildir til 30. september 2025 en samningar hafa verið lausir frá 1. janúar 2019.
„Samninganefnd Flugfreyjufélags Íslands (FFÍ) hefur frá upphafi þessara löngu og flóknu samningalotu fundið til ábyrgðar og sýnt mikinn samningsvilja. Líkt og flugmenn og flugvirkjar hafa flugfreyjur og flugþjónar ætíð verið tilbúin til að leggja sitt lóð á vogarskálarnar og mæta fyrirtækinu á erfiðum tímum. Starfsöryggi félagsmanna FFÍ var eitt af aðaláhersluatriðum samninganefndar í viðræðunum. Með nýjum samningi kom FFÍ til móts við Icelandair í því gjörbreytta landslagi sem blasir við fyrirtækinu og gerir því kleift að auka samkeppnishæfni og sveigjanleika félagsins.“
Segir Guðlaug Líney Jóhannsdóttir, formaður FFÍ, í tilkynningu sem FFÍ sendi á fjölmiðla í nótt.
Samningurinn verður kynntur fyrir félagsmönnum FFÍ á föstudaginn og atkvæðagreiðsla um hann fer fram í kjölfarið.
