Kári Stefánsson segir að líklegt sé að Íslensk erfðagreining taki þátt í verkefninu um skimum ferðamanna á Keflavíkurflugvelli eftir 15. júní. Fréttablaðið greinir frá. Kári fór á fund Katrínar Jakobsdóttur forsætisráðherra í Stjórnarráðinu í morgun. Þar var samstarf um skimunina rætt.

Eins og frægt er orðið lýsti Kári því yfir í viðtali við Kastljós í gærkvöld að ekki yrði af þátttöku ÍE í verkefninu og var Kári afar óánægður með Svandísi Svavarsdóttur heilbrigðisráðherra sem hvorki hefði haft samband við fyrirtækið vegna verkefnisins né þakkað því framlag sitt til baráttunnar gegn kórónuveirufaraldrinum en ÍE hefur annast 80% af þeim skimunum sem gerðar hafa verið fyrir veirunni á móti 20% hjá veirufræðideild Landspítalans.