Helga sagði þetta vera gert vegna COVID-19 faraldursins en fyrir stuttu þurfti Bláa Lónið að loka vegna faraldursins. Helga segir þessum starfsmönnum hafa verið sagt upp til að vernda hin 600 störfin sem eftir eru. „Já þetta eru fordæmalausar aðstæður, það verður lokað út apríl, fullkomin óvissa um framhaldið og það er afar mikilvægt að tryggja rekstur fyrirtækisins og rekstur til framtíðar.
Fyrir stuttu varð til mikil umræða á Twitter eftir að Siggeir F. Ævarsson, framkvæmdastjóri Siðmenntar birti í kvöld færslur á Twitter, þar sem hann gagnrýndi stjórn Bláa lónsins. Siggeir sagði galið að fyrirtæki væri að reiða sig á úrræði ríkisstjórnarinnar til að borga starfsmönnum laun, þegar að arðgreiðslur til stjórnenda fyrirtækisins hefðu verið fjórir milljarðar í fyrra.
Helga var spurð út í það hvort ekki hefði verið hægt að koma í veg fyrir uppsagnirnar ef greiddur hefði verið minni arður undanfarin ár. Helga svaraði því og sagði þetta vera fordæmalausa tíma. Hún hefði ekkert að segja um arðgreiðslur heldur er það stjórnin sem ákveður það. Þá minntist hún einnig á að skattspor fyrirtækisins hafi verið tæpir 6 milljarðar í fyrra. „Það sem við erum fyrst og fremst að gera er að tryggja rekstur fyrirtækisins og verja hin 600 störfin til framtíðar við þessar fordæmalausu aðstæður sem við búum við í dag.“
