Íslensk kona lést af völdum COVID-19 í gær. Var hún fyrsti Íslendingurinn sem lætur lífið af völdum veirunnar sem hefur herjað á heiminn undanfarnar vikur. Sonur konunnar birti í morgun færslu á Facebook-síðu sinni þar sem hann kvaddi móður sína.

„Hún barðist í heila viku fyr­ir lífi sínu“

„Sjálfsagt er flest­um að verða ljóst að litla landið okk­ar hef­ur þurft að þola sitt fyrsta dauðsfall af völd­um Covid 19 veirunn­ar, þó dauðsfall í fjöl­skyld­unni sé mikið einka­mál fyr­ir flesta þá lang­ar mig að sem flest okk­ar læri eitt­hvað af þessu,“ segir í færslu sonarins sem Stundin birti. „Þetta er mamma mín, hún barðist í heila viku fyr­ir lífi sínu smituð af Covid-19 veirunni, hún var í áhættu­flokki eins og mjög marg­ir aðrir.“

Landspítalinn tilkynnti andlátið í morgun með tilkynningu. „Mánudaginn 23. mars 2020 lést á smitsjúkdómadeild Landspítala liðlega sjötug kona, sem glímt hafði við langvarandi veikindi. Andlátið varð í kjölfar veikinda konunnar af völdum Covid-19-sjúkdómsins. Landspítali vottar fjölskyldu hennar samúð,“ sagði í tilkynningunni.

„Það er kom­inn tími til að þessi þjóð taki þessu al­var­lega og hætti að haga sér eins og hálf­vit­ar“

Sonur konunnar þurfti að kveðja móður sína í gegnum síma vegna smithættu. „Þrír úr minni fjöl­skyldu höfðu tæki­færi til að kveðja hana fyr­ir enda­lok­in. Tveir þeirra vegna þess að þeir eru smitaðir af veirunni og ein sem lagði sig í mikla smit­hættu, ég hefði al­veg þegið að fá að horfa í augu henn­ar og segja bless en vegna aðstæðna var það ekki hægt. Í staðinn fæ ég að minn­ast henn­ar eins og ég sá hana síðast og fékk að kveðja hana í gegn­um sím­ann og ekka­sog.“

Hann botnar færsluna með því að senda landsmönnum mikilvæg skilaboð. „Það er al­veg kom­inn tími til að þessi þjóð og þegn­ar henn­ar taki þessu al­var­lega og hætti að haga sér eins og hálf­vit­ar“