Kona var flutt með sjúkrabíl á slysadeild eftir slys í Grafarvogi á tólfta tímanum í gærkvöldi. Í skeyti frá lögreglu í morgun kemur fram að konan hafi dottið aftur fyrir sig og var hún talin hafa rotast.
Konan var með meðvitund þegar viðbragðsaðilar komu á vettvang og var hún flutt á slysadeild.
Stuttu síðar barst tilkynning um umferðaróhapp á Vesturlandsvegi á Kjalarnesi. Þar hafði bifreið verið ekið á ljósastaur. Ekki urðu slys á fólki en bifreiðin var óökufær og flutt burt með dráttarbifreið. Orkuveitunni var tilkynnt um tjónið á staurnum.
Rétt fyrir klukkan eitt í nótt var svo tilkynnt um umferðaróhapp á Sæbraut. Tjónvaldur er grunaður um akstur undir áhrifum fíkniefna og þá hafði hann ekki ökuskírteini sitt meðferðis.
Rétt fyrir tvö í nótt var svo tilkynnt um innbrot og þjófnað úr verslun í miðborginni. Ekkert frekar er skráð um málið og því liggur ekki fyrir hvort þjófurinn hafi haft mikil verðmæti á brott með sér.