„Þetta fékk ég sent í pósti í morgun,“ segir Dagur nokkur á Twitter síðu sinni en meðfylgjandi er mynd af markpósti frá bleyjuframleiðandanum Libero. „Eru semsagt markaðsfyrirtæki að skrapa saman kennitölum nýfæddra barna úr þjóðskrá og hafa svo uppá foreldrum til að senda þeim óumbeðið markaðsefni þó maður sé með rauðmerktan póstkassa? Er þetta ekki full langt gengið?“

„Þetta er það ÖMURLEGASTA við að eignast barn!“ segir þá Silja nokkur og segist verða svo reið og pirruð „í hvert einasta fokking skipti“ sem hún fær „eitthvað fokking drasl“ sent heim handa barninu sínu.

Auður Kolbrá lögfræðingur lenti í þessu á sínum tíma. „Ég trompaðist þegar ég lenti í þessu fyrir tæpum tveimur árum,“ segir Auður en þá fór umræða um málið af stað eftir að RÚV fjallaði um málið.

Í athugasemdum við tíst Dags veltir fólk því einnig fyrir sér hvaðan þessar upplýsingar um ungabörnin koma. Guðfinna nokkur segist vita hvaðan upplýsingarnar koma en systir hennar spurði fyrirtækið út í málið. „Upplýsingarnar eru fengnar frá Þjóðskrá Íslands. Listar eru keyptir af Póstinum sem sendir síðan út á alla foreldra barna á ákveðnum aldri, sem eru ekki bannmerktir í Þjóðskrá. Við vonum að þú njótir sendingarinnar,“ sagði í svarinu frá fyrirtækinu. „Undarlegt að ríkisstarsmenn séu að selja fyrirtækjum þessar upplýsingar,“ segir Heimir nokkur í kjölfarið.