Fréttablaðið greindi frá því fyrir skemmstu að Lögreglan á Austurlandi væri nú að ræða við karlmann vegna meintra hótana, sem fjölmiðlar hafa fjallað um í dag, gagnvart Katrínu Jakobsdóttur, forsætisráðherra.
Sjá einnig: Uppnám á Seyðisfirði – Katrínu hótað
Fram kemur að karlmaðurinn sé íbúi á Seyðisfirði og sé hreinlega ekki sáttur við atburði síðastliðinna daga, en hann ræddi við Fréttablaðið og sagði að hamfarirnar á Seyðisfirði væru ekki náttúruhamfarir heldur afleiðingar vanrækslu stjórnvalda, sem hefðu getað komið í veg fyrir svona mikla eyðileggingu.
„Ég vil láta vita að lögreglan er að taka mig á lögreglustöðina vegna hótana. Ég er í Rauða krossinum núna sem hún [forsætisráðherra] er á leið að heimsækja og ég hef verið beðin að fara,“
„Þetta er misnotkun á valdi og spilling. Ég er að fara á lögreglustöðina núna,“
Einnig hafi maðurinn verið spurður hvort hann hafi hótað forsætisráðherra, en svarað því neitandi.
„Nei. Ég hringdi í þrjá eða fjóra þingmenn í morgun og Elizu Reid og talaði um það sem hefur gerst á Seyðisfirði og að ekki sé um náttúruhamfarir að ræða heldur mistök hjá ríkisstjórninni. Það er verið að þagga niður í mér og ég fer með mínum eigin vilja,“
Þá hafi Kristján Ólafur Guðnason, lögreglufulltrúi á Austurlandi, staðfest að lögreglan sé nú að ræða við mann vegna málsins, en enginn hafi verið handtekinn.
Þá greindi Austurfrétt frá því að maðurinn hafi sent blaðamanni tvö SMS-skeyti, sem voru eftirfarandi:
„Það er verið að handtaka mig af lögreglunni fyrir að segja hug minn“
„Ég verð á lögreglustöðinni meðan forsætisráðherra hittir fólk á Egilsstöðum.“