Skiptastjóri þrotabús heildverslunarinnar Eggert Kristjánsson hf hefur sent frá sér tilkynningu þess efnis að skiptum í þrotabúinu sé lokið eftir fjögurra ára vinnu.
Um var að ræða stórt gjaldþrot almennar kröfur, að fjárhæð yfir 325 milljónir, greiðast að fullu. Segir skiptastjóri, Sveinn Andri Sveinsson, að um árangursríkustu gjaldþrotaskipti sögunnar sé að ræða. Tilkynning hans er eftirfarandi:
„Eftir rúmlega fjögurra ára skiptameðferð lauk í dag, 15. desember 2020, skiptum í þrotabúi EK1923 ehf., áður Eggert Kristjánsson hf., heildverzlun.
Á síðasta skiptafundinum samþykktu kröfuhafar frumvarp skiptastjóra að úthlutunargerð.
Auk þess að greiða upp búskröfur og forgangskröfur, lauk skiptum með því að almennar kröfur að fjárhæð kr. 325.886.301 greiðast að fullu. Upp í eftirstæðar kröfur, sem eru dráttarvextir og kostnaður eftir úrskurðardag gjaldþrotaskipta, samtals kr. 186.657.449, greiðast 59%.
Við upphaf gjaldþrotaskiptameðferðar EK1923 ehf. voru 6,8 mkr. til á reikningum búsins. Sjö dómsmálum síðar voru eignirnar orðnar 635 mkr. Mikið hefur gengið á við skipti þessa bús og mörgu tjaldað til. En það sem skiptir máli þegar upp er staðið, með góðu samstarfi skiptastjóra og lögmanna kröfuhafa, er að gjaldþrotaskiptameðferð EK1923 ehf. er sú árangursríkasta í sögu íslensks gjaldþrotaréttar.
Sveinn Andri Sveinsson hrl
skiptastjóri EK1923 ehf.“
