Vægar afléttingar á samkomutakmörkunum hafa vakið mikla gagnrýni en nýjar sóttvarnaráðstafanir taka gildi í dag og eru í gildi til 12. janúar. Á upplýsingafundi dagsins svaraði Þórólfur Guðnason sóttvarnalæknir þeirri gagnrýni sem komið hefur fram.
Annars vegar hefur verið gagnrýnt að sundstaðir geti opnað núna en líkamsræktarstöðvar séu lokaðar. Þórólfur benti á að hætta af smiti á líkamsræktarstöðvum sé sjö sinnum meiri en af sundstöðum. Hjá Sóttvarnastofnun Evrópu og WHO séu líkamsræktarstöðvar settar í efsta áhættuflokk varðandi Covid-19.
Hins vegar hefur verið gagnrýnt að íþróttastarf sé aðeins leyft hjá afreksfólki og í efstu deildum hópíþrótta. Þórólfur sagði að þetta væri í samræmi við óskir íþróttahreyfingarinnar sjálfrar. Þetta sé í samræmi við þau markmið að aflétta takmörkunum hægt og það væri ekki í samræmi við þau markmið að leyfa allt íþróttastarf.
Aðeins fjórir greindust innanlands í gær með Covid-19 og þar af voru þrír í sóttkví. Um 800 sýni voru tekin, sem er heldur færra en undanfarið. Hlutfall sýktra meðal þeirra sem eru skimaðir er komið niður í 0,5% en var 5% þegar mest lét. Þórólfur sagði að faraldurinn væri á niðurleið og þetta væri ánægjuleg þróun en lítið mætti út af bregða til að bakslag yrði.