Sabine Leskopf, borgarfulltrúi Samfylkingarinnar, deildi í gær færslu í hverfishóp Langholtshverfisins í Reykjavík á Facebook en Mannlíf vakti athygli á færslunni í dag.
Í færslunni sagði Sabine frá konu sem hún sá á horni Langholtsvegs og Holtavegs en konan var með eins konar mótmælaskilti. Á skiltunum stóðu ýmsir hlutir eins og „ótti lamar ofnæmiskerfi“ en auk þess mótmælti konan bólusetningum og takmörkunum á frelsi einstaklingsins.
„Það var smá sjokk,“ sagði Sabine um það þegar hún sá konuna mótmæla þessu en konan var stödd rétt hjá grunnskólanum Langholtsskóla. „Ég sá hana ekki gefa sig á tal við börn en hún náttúrulega stóð þarna rétt hjá skólanum,“ segir Sabine í samtali við DV um málið.
„Venjulega finnst mér ótrúlega gaman að taka alls konar samtöl en sem manneskja sem hefur misst ættingja úr þessu sjúkdómi vissi ég betur, vissi að ég væri of reið í svona hálfvitaskap til að taka það samtal,“ segir Sabine í færslunni. „Og það er kannski fyrir bestu – hvet ykkur að heiðra svona ekki við ykkar tíma. Treysti svo á okkar skólakerfi og ykkur sem foreldrar að börnin séu nógu upplýst til að láta slíkt ekki trufla sér.“
Meðlimir í Facebook-hópnum voru ekkert afskaplega ánægðir með mótmæli konunnar. „Þessi kona er algjört fífl,“ sagði maður nokkur. „Þessi kona á eitthvað erfitt og gerir sér ekki grein fyrir hvað þessi veira er hættuleg,“ sagði síðan kona nokkur. „Virkilega heimskulegt!“ sagði síðan önnur.