Bæklingur Reykjavíkurborgar sem fór á öll heimili Reykjavíkur og nágrannasveitarfélaga á höfuðborgarsvæðinu kostaði borgina rúmar tíu milljónir króna. 10,2 milljónir reyndar, nákvæmlega, án virðisaukaskatts. Mikið virðist hafa verið lagt í bæklinginn, því hann taldi heilar 64 blaðsíður, prentaður í lit á góðan pappír.
Kostnaðurinn skiptist svo að 3,3 milljónir runnu til Athygli ehf. sem ritstýrði útgáfunni, sinnti efnis- og myndaöflun, textaskrifum, uppsetningarvinnu með umbrotsmanni, frágangi og fleiru. Athygli er meðal annars í eigu Kolbeins Marteinssonar, fyrrum aðstoðarmanns Katrínar Júlíusdóttur, iðnaðarráðherra og þingmanns Samfylkingarinnar og flokkssystur Dags B. Eggertssonar borgarstjóra. Aðrar 1,25 milljónir fóru í hönnun og umbrot og prentunin kostaði 3,8 milljónir. Ísafold sá um prentun bæklingsins. Dreifingin á öll þessi heimili kostaði borgarbúa svo tvær milljónir.
Þetta kemur fram í svari við fyrirspurn borgarráðsfulltrúa Sjálfstæðisflokksins um bæklinginn. Þar segir enn fremur að borgarstjóri, borgarritari og upplýsingadeild hafi veitt aðstoð við framleiðslu bæklingsins.
Bæklingurinn var prentaður í 63,500 eintökum, að því er fram kemur í svarinu. Samkvæmt óvísindalegum mælingum DV vó bæklingurinn 151 grömm. Það má því gera ráð fyrir því að Reykjavíkurborg hafi sent 9,6 tonn af pappír inn á heimili íbúa höfuðborgarsvæðisins. Ljóst er að bæklingaprent og póstdreifing er án efa óumhverfisvænasta dreifingarleið upplýsinga sem völ er á og hafa sumir haft á því orð að kaldhæðnin leyni sér ekki þegar bæklingur um umhverfisvæna kosti í skipulags- og byggingarmálum er prentaður og sendur með þessum hætti.
Samkvæmt tölum bandarísku umhverfisstofnunarinnar þarf rúma 7 rúmmetra af niðurskornum trjám til þess að framleiða eitt tonn af pappír auk gríðarlegs magns af vatni og öðrum efnum. Í kynningarefni Græna plans Dags B. Eggertssonar borgarstjóra hafa því farið að lágmarki 67 rúmmetrar af trjám, nokkur hundruð tonn af vatni auk mikils magns af leir, kolum, brennisteini og auðvitað rafmagni. Til að setja magnið í enn betra samhengi, eru sjö rúmmetrar af við um 30 stykki af 10 metra háum, 30 sentimetra breiðum standandi trjám.
Í svari borgarinnar, sem sjá mér hér í heilu lagi, segir jafnframt að ekki hafi verið farið í útboð vegna gerð bæklingsins. Öll herlegheitin voru svo kynnt í ráðhúsinu í byrjun júní, og sjá má upptökur af fundi Dags borgarstjóra hér.
