Ólafur Þór Hauksson héraðssaksóknari hefur ákært mann fyrir nauðgun. Er maðurinn sakaður um að hafa aðfaranótt sunnudagsins 30. september 2018 á heimili sínu, án samþykkis og með ofbeldi og ólögmætri nauðung, haft samræði og önnur kynferðismök við konu. Konan grét og sagði honum að hún vildi þetta ekki og segir í ákæru að hún hafi ekki getað spornað við verknaðinum vegna ölvunar, áhrifa af fíkniefnum og svefndrunga.
Þess er krafist að maðurinn verði dæmdur til refsingar og greiðslu alls sakarkostnaðar.
Konan gerir einkaréttarkröfu á hendur manninum þar sem hún krefur hann um 4 milljónir króna í skaðabætur. Þá krefst hún þess að maðurinn greiði útlagðan sjúkrakostnað hennar en upplýsingar um hann verða lagðar fram fyrir dómi.
Málið verður tekið fyrir við Héraðsdóm Reykjaness á næstunni.