Maður var í dag dæmdur í tveggja mánaða skilorðsbundið fangelsi og til endugreiðslu fjármuni sem hann sveikt út upp á um 850 þúsund krónur.

Ákæran var í tveimur liðum. Annars vegar var maðurinn ákærður fyrir skjalafals, fyrir að hafa átta sinnum framvísað í útibúum Íslandsbanka yfirlýsingum vegna útborgunar orlofsfjár utan orlofstíma, útgefnum af Myllunni, af tilteknum orlofsreikningi. Tók hann með þessum hætti út samtals 722 þúsund krónur.

Hins vegar var maðurinn ákærður fyrir að hafa með blekkingum tekið út þrisvar sinnum af bankareikningi annars einstaklings úr Íslandsbanka að Höfðabakka, samtals 126 þúsund krónur, og villti hann þá á sér heimildir.

Maðurinn hefur hlotið einn refsidóm áður en það hafði ekki áhrif á ákvörðun refsingar. Jákvæð áhrif hafði á niðurstöðu að maðurinn játaði brot sín skýlaust.

Niðurstaðan er sem fyrr segir 2 mánaða skilorðsbundið fangelsi en auk þess þarf maðurinn að greiða Íslandsabanka  um 850 þúsund krónur og 91 þúsund í málskostnað.

Dómurinn var kveðinn upp í Héraðsdómi Reykjavíkur.