Kristján Þór Sigfússon, fyrrverandi eigandi Argentínu steikhúss, var í október sakfelldur í Héraðsdómi Reykjavíkur fyrir skattsvik og peningaþvætti. Dómurinn birtist í dag á heimsíðu dómstólanna. Eins og DV sagði frá fyrr í haust, þegar Kristján var ákærður, var Kristján annar eigandi veitingastaðarins sögufræga allt frá árinu 1990 og þar til félag í hans eigu, Pottur ehf., varð gjaldþrota árið 2017. Tóku þá aðrir eigendur við rekstri Argentínu steikhúss.

Ekkert fékkst upp í kröfur í þrotabú Potts ehf. á sínum tíma, en lýstar kröfur voru 86 milljónir.

Kristján var ákærður fyrir meiri háttar brot á skattalögum og peningaþvætti, með því að hafa ekki staðið skil á virðisaukaskattskýrslum Potts ehf., og að hafa ekki greitt virðisaukaskatt sem innheimtur var í rekstri félagsins á árunum 2015 og 2016. Nam vangreiddur virðisaukaskattur rúmum ellefu milljónum.

Þá var Kristján einnig ákærður fyrir að hafa ekki staðið skil á staðgreiðslu opinberra gjalda á árunum 2015, 2016 og fyrstu tveim mánuðum 2017. Samtals námu svikin rúmum 17 milljónum.

Samanlagt var því um tæplega 29 milljóna skattsvik að ræða. Kristján viðurkenndi brot sín við þingfestingu málsins og kom þá fram í máli hans og lögmanns síns að rekstur veitingastaðarins hafði þyngst verulega á undanförnum árum, útgjöld hækkað og samkeppnin harðnað. Peningarnir sem áttu að renna til ríkisins fóru, að þeirra sögn, í reksturinn en ekki vasa eiganda.

Fyrir brot sín er Kristjáni gert að sjö mánaða fangelsisdómi, skilorðsbundnum til tveggja ára. Þá skal hann greiða 35 milljóna sekt í ríkissjóð innan fjögurra vikan en sæta annars 12 mánaða fangelsisvist.