Fréttir DV þess efnis að fyrrverandi starfsfólk Jóa Fel hafi í hrönnum fengið bréf frá þrotabúi félagsins, þess efnis að það skuldaði fyrirtækinu peninga, jafnvel hundruð þúsunda, vöktu mikla athygli. Svo virðist sem vöruúttektir fólksins hafi verið skuldfærðar í bókhaldi en ekki hafi verið fært til bókar þegar þær voru dregnar frá launum þess.
Helga Vala Helgadóttir, þingmaður Samfylkingarinnar og frambjóðandi til embættis varaformanns flokksins, tjáir sig um málið á Facebook-síðu henni en ung kona henni nákomin starfaði hjá Jóa Fel. Bendir Helga á að þessi óþægilegu bréf komi í kjölfar þess að fólkið hafi mátt þola launaþjófnað. Helga Vala er ómyrk í máli:
„Nei hættið nú alveg! Nú get ég ekki orða bundist. Manneskja mér nákomin starfaði þarna frá árinu 2018. Þegar hún ætlaði að nýta sér rétt sinn snemma á þessu ári til að fá gleraugnastyrk frá VR kom í ljós að afteknum stéttarfélagsgjöldum hafði ekki verið skilað né heldur lífeyrissjóðsgjöldum eða öðru. Það var bara eins og hún hefði ekkert unnið þarna, átti engan rétt og svo kom í ljós að launaþjófnaður hafði að auki verið stundaður á þessari ungu konu.
Nú er starfsfólki send rukkun! Starfsfólki sem nýlega hefur missti vinnuna – starfsfólki sem á fjögurra ára tímabili tók út vörur og var rukkað samviskusamlega um. Það virðist sem „gleymst“ hafi að færa þetta inn í bókhaldið og þá virðist skiptastjóra detta það eitt í hug að senda áður láglaunafólkinu, sem nú er líklega flest allt atvinnulaust rukkun. Þetta finnst mér alveg ömurlegt þótt ég viti vel að skiptastjóri beri ekki ábyrgð á fyrri slóðaskap eigenda þá er þetta ofsalega aumt allt.“
