Héraðsdómur Reykjaness hefur dæmt mann í sex mánaða fangelsi, skilorðsbundið til tveggja ára, fyrir líkamsmeiðingar af gáleysi og ölvunarakstur. Þá er maðurinn með dómnum sviptur ökurétti í tíu mánuði og honum gert að greiða allan málskostnað auk kostnað vegna réttargæslumanns, samtals um ein og hálf milljón.

Forsaga málsins er sú að í desember 2017 ók maðurinn ölvaður með farþega í bíl sínum um götur Hafnarfjarðar. Lauk bíltúr þeirra með nokkuð alvarlegum árekstri er ökumaðurinn missti stjórn á ökutækinu. Fór bíllinn við það yfir á öfugan vegarhelming, rakst þar á gangstéttarkant með þeim afleiðingum að ökutækið kastaðist á ljósastaur og þaðan á klettavegg. Hafnaði ökutækið á hægri hlið þess við áreksturinn. Segir í dómnum: „Við áreksturinn hlaut farþegi í ökutækinu slíka fjöláverka, að hann er bundinn í hjólastól.“

Ökumaðurinn var af þessum sökum ákærður í maí á þessu ári fyrir ölvunarakstur, en vínandamagn mældist 1,15 prómill í blóði mannsins, og fyrir líkamsmeiðingar af gáleysi, samkvæmt 219. gr. almennra hegningarlaga. Við brot á því ákvæði liggur allt að tveggja ára fangelsi.

Við meðferð málsins fyrir dómi játaði maðurinn sök. Var litið til þess við ákvörðun refsingar, auk þess að ákærða hafði ekki áður gerst brotlegur við lög. Þá var jafnframt litið til þess að talsverður dráttur hefði orðið á rekstur málsins af hálfu ákæruvaldsins og dómstóla, að málið hefði tekið mjög á ákærða en hann sagði fyrir dómi að „ekki liði sá dagur að hann hugsaði ekki um það,“ og að hann hafi leitað sér aðstoðar vegna þess.

Farþeginn hafði uppi einkaréttarkröfur er ákæra var gefin út, en við játningu mannsins lét farþeginn hana niður falla.