Nýtt minnisblað Þórólfs Guðnasonar sóttvarnalæknis er í vinnslu og verður sent heilbrigðisráðherra líklega seint í dag. Þar sem einstakar tilllögur liggja ekki fyrir vildi Þórólfur ekki upplýsa um efni væntanlegs minnisblað á upplýsingafundi dagsins.

42 innanlandssmit greindust í gær, þar af voru 20 ekki í sóttkví. Rúmlega 2000 sýni voru tekin.

Þórólfur upplýsti að 140 tilfelli mætti rekja til smits á Landakoti beint og óbeint. Fjöldi einstaklinga í sóttkví vegna þeirrar sýkingar er um 300.

Einnig er stór hópsýking frá Ölduselssskóla þar sem 44 hafa greinst. Þá greindi Þórólfur frá því að margar litlar hópsýkingar hafi orðið, sem tengjast fjölskyldum, veislum, vinahópum og vinnustöðum.

Engin smit á landamærum greindust í gær.

Þrettán hafa látist af sjúkdómnum og eitt dauðsfall varð í nótt, var það einstaklingur á níræðisaldri sem lá á Landspítalanum við Fossvog.

Þórólfur sagði að hertar aðgerðir myndu standa í 2-3 vikur og ef vel gengi væri hægt að hefjast handa við tilslakanir eftir það.

Þórólfur brýndi fólk til að mæta ekki veikt í vinnu. Ennfremur hvatti hann fólk til að forðast hópamyndun. „Við eigum langt í land með að ná tökum á þessari veiru, við þurfum að standa saman,“ sagði hann.