Dagbjartur Arilíusson, framkvæmdastjóri Steðja Brugghúss hefur verið boðaður til skýrslutöku hjá lögreglu vegna netsölu á framleiðslu brugghússins.
Fréttablaðið greindi frá því á dögunum að Steðji væri fyrsta brugghúsið á Íslandi sem hefði opnað vefverslun með áfengi.
Dagbjartur benti á í viðtali við Bylgjuna í morgun að samkvæmt EES-reglum væri netverslun með bjór heimil. Óþolandi sé að Íslendingar geti ekki keypt bjór í innlendri netsölu á sama tíma og þeir geti keypt bjórt erlendis frá í gegnum netið: „Í stuttu máli getur þú keypt bjór erlendis frá og fengið hann sendan heim með póstinum, án nokkurra kvaða eða vandamála. En sem Íslendingur geturðu ekki keypt íslenska vöru og fengið heimsenda. Það er algjörlega galið. Þið sjáið það bara, ef Þjóðverjar mættu bara kaupa bjór frá Frakklandi, myndi það ganga upp?“
Dagbjartur segist ætla að láta hart mæta hörðu og segist tilbúinn að fara með mál sitt fyrir EFTA-dómstólinn.
Hann kvartaði einnig undan því að dreifingarkerfi ÁTVR færi illa með litla aðila á borð við Steðja. Aðeins væri í boði að vera með vörur fyrirtækisins í tveimur verslunum ÁTVR. Hilluplássið væri mjög takmarkað fyrir litla aðila og þeir yrðu að kaupa sjálfir upp framleiðslu sína til að að komast almennilega að með vöruna í búðum ÁTVR.
„Við erum að fá gríðarlegar undirtektir,“ sagði Dagbjartur við Bylgjuna en hann segir að fólk vilji standa með litlum aðilum á markaðnum, því það sæi hvaða mismunun væri í gangi. Var hann að koma úr hringferð um landið þar sem hann kynnti vörur brugghússins.
