Héraðssaksóknari hefur ákært mann á fimmtugsaldri fyrir sérstaklega hættulega líkamsárás og hættubrot með því að hafa í september í fyrra ekið vörubifreið af gerðinni Volvo-VH að manni og klemmt hann þannig á milli vörubílsins og sendibifreiðar. Hlaut maðurinn af árásinni mjúkpartaáverka á baki, að því er segir í ákærunni, auk þess sem hann marðist á hendi og hné.
Þess er krafist að maðurinn sæti refsingu og greiði allan sakarkostnað sem af málinu hlýst.
Þá gerir brotaþoli einkaréttarkröfu í málinu. Þar krefst hann miskabóta að fjárhæð 1.100.000 kr.- og að sá ákærði greiði þóknun réttargæslumanns síns í málinu.
Málið verður þingfest á föstudaginn næstkomandi, þann 23. október í héraðsdómi Reykjaness.
