Maður sem bjargaðist úr eldsvoða í Samtúni í Reykjavík í vikunni telur að kveikt hafi verið í húsnæðinu. Hann lítur á verknaðinn sem morðtilraun. Maðurinn er á þrítugsaldri, dvaldist hann tímabundið í kjallaraíbúð sem kviknaði í aðfaranótt fimmtudags.

Manninum tókst brjóta að sér leið út úr íbúðinni út um glugga. Var hann fluttur á slysadeild með reykeitrun en heilsast vel núna.

Maðurinn segir í samtali við DV að er hann vaknaði við eldinn hafi hann farið að huga að öðru fólki sem hann taldi vera sofandi í íbúðinni, en komst að því að það fólk var farið og hann hafði verið skilinn eftir einn. Tók hann eftir því að búið var að stafla upp miklu magni af dagblöðum í íbúðinni og kveikja í þeim.

Segist maðurinn líta á þetta sem morðtilraun við sig, þ.e. að meintri íkveikju hafi verið beint gegn honum.

Vel gekk að slökkva eldinn eftir að slökkvilið kom á vettvang og náði eldurinn ekki að breiðast út yfir í íbúðir fyrir ofan.

DV hafði samband við Lögregluna á höfuðborgarsvæðinu vegna málsins og fengust þau svör að rannsókn á eldsupptökum standi yfir og ljúki henni ekki fyrr en í næstu viku.