Lovísa spurði á Twitter-síðu sinni nýlega hvort það hafi engin trans manneskja greinst með Covid-19. Þegar Lovísa er spurð hvers vegna hún spyr að þessu þá vísar hún í upplýsingar frá Covid.is þar sem sést að 910 konur og 900 karlmenn hafi smitast af veirunni. Segja má að Lovísa sé með því að gefa í skyn að trans fólk falli ekki undir þessa tvo flokka.
Hvernig er það nú, hefur enginn trans greinst með covid-19?
— Lovísa Líf Jónsdóttir (@lovisalifjonsd) September 27, 2020
Maður nokkur svarar útskýringu Lovísu. „Trans konur eru konur, trans karlar eru karlar. Skil ekki hvað þessi mynd kemur málinu við. Með uppsetningunni er kannski fremur grafið undan stöðu kynsegin og þeirra sem falla ekki undir úrelta kynjatvískiptingu, en vonandi er bara staðan sú að engin smit hafa komið upp,“ segir maðurinn.
Kona nokkur vakti athygli á tísti Lovísu í dag. Hún spurði hvort Lovísa ætli að láta eins og það sé ekki hægt að túlka tístið hennar þannig að hún væri að gefa í skyn að veiran tengist trans fólki. „Hefði skilið þetta ef þú hefðir látið myndina sem þú svarar með fylgja upprunalega tweetinu en það gerðiru ekki,“ segir konan síðan en myndin sem um er að ræða er skjáskot af upplýsingunum af Covid.is þar sem fjöldi smita meðal kvenna og karla sést.
„Ég sé það persónulega ekki. Ég get ekki tekið ábyrgð á afbrigðilegum túlkunarsjónarmiðum og útúrsnúningum annarra,“ segir Lovísa í svari á Twitter við spurningu konunnar.
Margir hafa tjáð sig um upprunalegu færslu Lovísu. Þeirra á meðal er Nína Richter, rithöfundur, ljósmyndari og fyrrum kvikmyndagagnrýnandi á RÚV. „Það er hræðilegur veruleiki ef hún er í alvörunni svona vitlaus,“ segir Nína. „Það er álíka hræðilegur veruleiki ef hún er að grínast og þetta er einhver ógeðslega ljótur einkahúmor. Allt við þetta er ömurlegt.“