Lögreglumaður hefur verið ákærður fyrir líkamsárás og brot í starfi vegna meintrar harkalegrar handtöku. Kom þetta fram í fréttum Stöðvar 2 í kvöld.

Meintur brotaþoli er 64 ára gamall maður sem að sögn lögfræðings hans er venjulegur borgari sem rekur fyrirtæki. Var hann handtekinn eftir að hann hafði farið út að skemmta sér eitt kvöldið.

Lögregluþjónarnir sem handtóku manninn staðhæfa að hann hafi verið dónalegur við þá og því gerst sekur um brot gegn valdstjórninni. Í ákæru er sagt að maðurinn hafi verið sleginn tveimur höggum í andlit, hné verið þrýst að hálsi hans og höfði og handjárnaðar hendur hans verið  ítrekað þvingaðar í sársaukastöðu.

Upptökur úr eftirlitsmyndavélum  urðu til þess að annar lögreglumaðurinn var ákærður fyrir handtökuna.