Nokkuð hefur borið á því að falsaðir 100 evru seðlar hafi verið notaðir í viðskiptum hér á landi að undanförnu. Í tilkynningu sem lögreglan á höfuðborgarsvæðinu birti á Facebook-síðu sinni kemur fram að nokkur tilvik hafi komið upp um helgina.
Lögregla vill beina þeim tilmælum til fólks að gæta að sér þegar verið er að taka við greiðslu í erlendum myntum og gæta vel að öryggisatriðum seðla. Verði fólk þess vart að reynt sé að greiða með fölsuðum seðli er best að kalla strax til lögreglu gegnum 112.
Lögregla deilir einnig tengli á vef evrópska Seðlabankans, en þar eru tíunduð nokkur atriði sem gott er að hafa í huga varðandi mögulegar peningafalsanir.
