Klukkan 03.20 í nótt var tilkynnt um rúðubrot í verslun úrsmiðs á Laugavegi. Ekki var farið inn í verslunina en vitni sá tvo menn hlaupa á brott. Á sjötta tímanum í gær var ölvaður maður handtekinn í Kringlunni, grunaður um þjófnað úr verslun. Ætlað þýfi fannst í bakpoka hans.

Klukkan 22 í gærkvöldi var tilkynnt um innbrot í húsnæði á Kjalarnesi. Ekki að sjá að neinu hafi verið stolið en gerandinn er sagður hafa ekið á kyrrstæða bifreið við húsið.

Á ellefta tímanum í gærkvöldi var tilkynnt um innbrot í tvær bifreiðar við íþróttasvæði í Fossvogshverfi. Einhverju var stolið úr bifreiðunum. Þjófurinn virðist hafa misst farsíma sem fannst á vettvangi.

Á tólfta tímanum í gærkvöldi lentu öryggisverðir í átökum við aðila sem er grunaður um þjófnað úr verslun í Breiðholti. Lögreglan kom á vettvang og afgreiddi málið.

Á tólfta tímanum var tilkynnt um þrjá drengi sem voru að brjóta rúður í strætóskýli. Lögreglan hafði afskipti af einum þeirra og sótti forráðamaður hans hann á lögreglustöð. Tilkynning um málið var send til barnaverndaryfirvalda.