Heimildir DV herma að COVID-19 smit hafi komið upp innan Lögreglunnar á höfuðborgarsvæði og hópur starfsmanna sé komin í sóttkví.

Hvorki náðist í lögreglustjóra né fjölmiðlafulltrúa lögreglunnar í morgun en fengust þó þau svör að von væri á tilkynningu frá lögreglunni.

Fréttin verður uppfærð.

Tilkynning frá lögreglunni barst 9:57 og er hér í heild sinni:  

Einn lögreglumaður hjá Lögreglunni á höfuðborgarsvæðinu hefur verið greindur með COVID-19, en talið er að viðkomandi hafi ekki smitast við störf sín hjá embættinu.

Gripið var til allra viðeigandi ráðstafana strax og málið kom upp í gær og voru þrettán aðrir lögreglumenn sendir í sóttkví vegna þessa, en að auki eru fimm lögreglumenn til viðbótar í úrvinnslusóttkví. Nú er unnið að því að tryggja mönnun á vaktir vegna þeirrar stöðu sem upp er komin og miðar þeirri vinnu vel.

Þess má geta að embættinu var skipt upp í sótthólf frá og með hádegi sl. föstudag, 31. júlí, og því hefur ofangreint áhrif á eina lögreglustöð í umdæminu, en ekki allar fjórar.

Ekki er hægt að veita frekari upplýsingar að svo stöddu.