Sigrún Jóhannsdóttir, sem gætti hagsmuna kvenna sem kærðu svokallaðan meðhöndlara  fyrir kynferðisbrot, verður ekki réttargæslumaður þeirra fyrir dómi. Kveðið var upp úr um þetta í Héraðsdómi Reykjaness í gær. Ástæðan er að Sigrún er á vitnalista hins ákærða sem ætlar þar með að leiða hana fram sem vitni fyrir dómi.

Fréttablaðið skýrir frá þessu. Nokkrar konur leituðu til Sigrúnar vegna meintra brota mannsins gegn þeim. Fleiri konur bættust í hópinn í kjölfar umfjöllunar fjölmiðla. Sigrún var réttargæslumaður kvennanna á meðan lögreglan rannsakaði málið.

Ákæra hefur verið gefin út á hendur manninum fyrir að hafa nauðgað fjórum konum. Fréttablaðið segir að við þingfestingu málsins hafi risið ágreiningur um skipun Sigrúnar sem réttargæslumanns. Hefur blaðið eftir Steinbergi Finnbogasyni, verjanda ákærða, að hann geti ekki tjáð sig um það sem fram fer í dómssalnum því um lokað þinghald sé að ræða.

Hann sagði einnig að lögfræðilegur tilbúningur málsins eigi sér aðdraganda sem standist varla skoðun og hyggist hann leiða það í ljós í vitnaleiðslum. Hann sagði vísbendingar um að Sigrún hafi sjálf staðið að baki auglýsingu þar sem leitað var að skjólstæðingum í fyrirhugaða hópmálsókn gegn hinum ákærða. Þetta hafi hún gert undir dulnefni á samfélagsmiðlum.

„Aftakan á skjólstæðingi mínum hefur þegar farið fram, enda fjölmiðlar ítrekað upplýstir um árangur af þessari smölun á meintum fórnarlömbum hans.“

Skipun annars réttargæslumanns í málinu var einnig afturkölluð með úrskurði dómara í gær þegar í ljós kom að sá er sambýlismaður Sigrúnar.