Maður hefur verið sakfelldur fyrir brot í nánu sambandi og brot gegn barnaverndarlögum. Maðurinn var sakaður um að hafa að kvöldi fimmtudagsins 16. febrúar árið 2018 veist að með ofbeldi að barnsmóður sinni á heimili þeirra í Reykjavík, „lagt hana í gólfið með með valdi svo hún rakst utan í hluti og tekið hana kverkataki tvisvar sinnum, með þeim afleiðingum að hún hlaut mar á mjöðm, hné, öxl og upphaldlegg og línulegt mar framanvert á hálsi bæði lóðrétt og lárétt og marblett aftanvert á hálsi hægra megin“, eins og segir í dómnum.

Dóttir parsins varð vitni að ofbeldinu og samkvæmt túlkun dómsins beitti hinn ákærði hana með þessu framferði sínu ógnunum og sýndi henni yfirgang og ruddalegt athæfi.

Hinn ákærði játaði brot sín skýlaust. Þess má geta að hann hefur ekki gerst sekur áður um hegningarlagabrot. Var það metið honum til refsilækkunar, bæði játningin og hrein sakaskrá. Fyrir dómi sagðist hann iðrast gjörða sinna.

Til refsiþyngingar var hins vegar metið að framferði mannsins var alvarlegt og ásetningur hans einbeittur. Þá metur dómarinn það mjög alvarlegt að brotið var framið á heimili brotaþola og fyrir framan barnið.

Maðurinn var dæmdur í þriggja mánaða skilorðsbundið fangelsi. Þá var hann dæmdur til að greiða sakarkostnað upp á um 160 þúsund krónur.